فرق تسد

للأسف فرق تسد هي سياسة التعامل الأكثر أنتشاراً الآن فرق تسود وتعلو وتكبر وتتغندر وتتفشور

زملاء العمل _زملاء الدراسة النادي الكافيه حتى البيت الواحد فرق تسد فرق تسد

وتكون لك الكلمه العليا طبعاً وهو مين بيتكلم غيرك ومين بيتواصل مع مين غير من خلالك

هل حقيقة أن الغاية تبرر الوسيلة حتى لو الوسيلة دي حطمت آمال ناس وخلفت وعود وخانت عهود

ليه أمانة النقل والحفاظ على كياسة الكلمة غابوا عنا غياب مريب لا يبدي أو يوضح الأسباب

 هل ضميرنا مات ومبقيناش نحاسب نفسنا ولا أحنا في قمة وعينا وعارفين اللي لينا واللي علينا بس بنتغاضى ونعدي ونفوت بمزاجنا وأزاي ننتظر أو نتأمل أي نجاح أو فلاح مع أنتشار الضغائن والمكائد أزاي وأعتى وأنجح الرجال والنساء أكدوا أن روح الفريق والتوحد بين الجماعات أقوى من أي سلاح فتاك كفيله أنها تقف في وش الريح أيوا طبعا ما هو لو جه الريح وأنا لوحدي هياخدني في رجليه لكن لو جه وأنت جنبي وأنتي ماسكه أيدي وهو متبت على أيدينا كلنا أكيد هنقدر نقف أدام الريح لأن طول ما أيدينا في أيد بعض هنكون ثابتين أكتر على الأرض وهنقدر نقف امام الريح

لكن مع فرق تسد كل واحد هيفضل لوحده وتبعد المسافات وتتوه الحاجات وتموت الحكايات

أوعوا تبيعوا ضميركوا وتتبعوا سياسة فرق تسد أوعوا تجروا ورا منصب أو كرسي أو زيادة راتب بطريقة فرق تسد لأن كل شيء في الدنيا الى زوال

الشيء الوحيد الباقي هو الخير والمعروف وعند ربنا لا تضيع المروءات

ولا الكلمة الطيبة دايماً جمعوا متفرقوش أفرحوا لنجاح بعض متنفسنوش

أبنوا مع بعض أفرح لنجاح زميلك عامل كما تحب أن تعامل صحي ضميرك أضحك في وش صاحبك وزميلك متتملقشي مديرك

متكذبشي ومتأفورشي من الأفورة يعني

بجد هتلاقي حاجات كتير أوي كانت متبعترة أتلمت

وحاجات كانت تايهه هتلاقيها

ونجاح كان بعيد عنك قرب وبقى بين أيديك

وأوعا تحاول تفرق علشان تسد

لأن الأيام دول وكما تدين تدان

وخليك دايماً فاكر النجاح الحقيقي هو اللي بيتبني على الجهد والأخلاص والعمل وروح الفريق

والنجاح المزيف هو اللي بيتبني على اكتاف الناس ومصائرهم وأكل عيشهم وجمع تكسب وتكبر وتنجح ومكسبك الحقيقي مش بس أحترام الناس ليك لأ كمان أحترامك لذاتك